સુરતના સરથાણામાં 28 વર્ષીય મહિલા ફિઝિયોથેરાપી ડોક્ટરે કેફેની 9મી માળેથી ઝંપલાવી આપઘાત કરતા ચકચાર મચી ગઈ છે.લેડી ડોક્ટરે સુરતના સરથાણા વિસ્તારમાં અતિથિ કોમર્શિયલ કોમ્પલેક્ષના 9મા માળેથી કૂદીને પોતાનું જીવન ટૂંકાવી લીધું હતું. કેફેમાં બેઠેલી યુવતી અચાનક ખુરશી પરથી ઉભી થઈને નીચે કૂદી પડતા અરેરાટી વ્યાપી ગઈ હતી.
મળતી માહિતી મુજબ,28 વર્ષીય ફિઝિયોથેરાપી ડોક્ટર રાધિકા જમનભાઈ કોટડીયા મૂળ જામનગર જિલ્લાના કાલાવડ તાલુકાના મોટી ભેગડી ગામની વતની હતી.રાધિકા સરથાણા જકાતનાકા નજીકના વિકાસ શોપર્સના પહેલા માળે પોતાનું શ્રીજી ફિઝિયો ક્લિનિક ચલાવતી હતી.રાધિકાની સગાઈ છ મહિના પહેલાં થઈ હતી અને આવતી 19 ફેબ્રુઆરી 2026ના રોજ તેના લગ્ન થવાના હતા.
પરિવારજનોએ જણાવ્યું કે રાધિકા રોજ સવાર-સાંજ પોતાના મંગેતર સાથે વાતો કરતી હતી. પ્રાથમિક તપાસમાં પોલીસને શંકા છે કે મંગેતર સાથેના કોઈ અણબનાવ અથવા તણાવને કારણે તેણે આ આપઘાતનું પગલું ભર્યું હોઈ શકે છે. હાલ પોલીસે સમગ્ર મામલે પરિવારજનોના નિવેદન નોંધી આપઘાત પાછળનું કારણ જાણવા તપાસ હાથ ધરી છે.
