બિહારના રાજકારણમાં છેલ્લા ઘણા સમયથી ચાલી રહેલી અટકળોનો અંત આવ્યો છે. મુખ્યમંત્રી નીતિશ કુમારે સોશિયલ મીડિયા પર એક ભાવુક અને મહત્વપૂર્ણ પોસ્ટ દ્વારા જાહેરાત કરી છે કે તેઓ હવે સક્રિય સંસદીય રાજનીતિના ભાગરૂપે રાજ્યસભામાં પ્રવેશ કરશે. આ નિર્ણયની સાથે જ બિહારમાં છેલ્લા બે દાયકાથી ચાલી રહેલા નીતિશ યુગના વિરામ અને નવી સરકારની રચનાના સંકેતો મળ્યા છે.
https://x.com/NitishKumar/status/2029427767293665709?s=20
નોંધનીય છે કે થોડા મહિના અગાઉ જ બિહારમાં વિધાનસભા ચૂંટણી યોજાઈ હતી. જેમાં ભારતીય જનતા પાર્ટી અને જનતા દળ યુનાઈટેડના ગઠબંધનને પ્રચંડ બહુમતી મળી હતી. જે બાદ નીતિશ કુમાર જ ફરી રાજ્યના મુખ્યમંત્રી બન્યા હતા. જોકે છેલ્લા 2 દિવસથી તેવી અટકળો ચાલી રહી હતી કે તેઓ રાજીનામું આપી શકે છે.
નીતિશ કુમારે પોતાની પોસ્ટમાં એક રસપ્રદ વાતનો ઉલ્લેખ કર્યો કે, તેમની સંસદીય કારકિર્દીની શરૂઆતથી જ તેમની ઈચ્છા બિહાર વિધાનસભા અને સંસદના બંને ગૃહો (લોકસભા અને રાજ્યસભા) ના સભ્ય બનવાની હતી. તેઓ લોકસભા અને વિધાનસભામાં રહી ચૂક્યા છે, પરંતુ રાજ્યસભામાં જવાનું હજુ બાકી હતું. તેમણે ઉમેર્યું કે, “હું રાજ્યસભા ચૂંટણી ૨૦૨૬ દ્વારા આ અધૂરી ઈચ્છા પૂરી કરવા માંગુ છું અને દેશના ઉચ્ચ સદનમાં બિહારનું પ્રતિનિધિત્વ કરવા ઈચ્છું છું.”
રાજકીય સમીકરણોમાં આવશે મોટો ફેરફાર
નીતિશ કુમારની આ જાહેરાત બાદ બિહારના રાજકીય વર્તુળોમાં હલચલ તેજ થઈ ગઈ છે:
નવા મુખ્યમંત્રી કોણ?: હવે બિહારની કમાન કોણ સંભાળશે તે સૌથી મોટો પ્રશ્ન છે. શું જનતા દળ (યુનાઈટેડ) માંથી જ કોઈ નવો ચહેરો આવશે કે પછી ગઠબંધન સરકારમાં કોઈ મોટો ફેરફાર થશે?
સંગઠન પર અસર: નીતિશ કુમાર દિલ્હી શિફ્ટ થવાથી પ્રાદેશિક અને રાષ્ટ્રીય સ્તરના રાજકીય સમીકરણો પર તેની સીધી અસર પડશે.
વિપક્ષની ભૂમિકા: વિપક્ષી પાર્ટીઓ આ સ્થિતિનો લાભ લેવા માટે પોતાની રણનીતિ ઘડવાનું શરૂ કરી દીધું છે.
