Asian Games 2026માં ભારતીય મહિલા હોકી ટીમે ચીનને 1-0થી હરાવી 44 વર્ષ બાદ ગોલ્ડ મેડલ જીત્યો. લાલરેમસિયામીના ગોલથી ભારતે LA 2028 ઓલિમ્પિક્સ માટે સીધી ક્વોલિફિકેશન મેળવી.
એશિયન ગેમ્સ 2026માં ભારતીય મહિલા હોકી ટીમે ઐતિહાસિક સિદ્ધિ મેળવી છે. જાપાનના આઈચી-નાગોયામાં રમાયેલી ફાઇનલમાં ભારતે ચીનને 1-0થી હરાવીને ગોલ્ડ મેડલ પોતાના નામે કર્યો છે. આ સાથે ભારતીય મહિલા હોકી ટીમે એશિયન ગેમ્સમાં ગોલ્ડ મેડલ માટેનો 44 વર્ષનો લાંબો ઈંતજાર પૂર્ણ કર્યો છે.
આ જીત ભારત માટે માત્ર ગોલ્ડ મેડલ પૂરતી સીમિત નથી રહી. ભારતીય મહિલા હોકી ટીમે આ શાનદાર જીત સાથે 2028 લોસ એન્જલસ ઓલિમ્પિક્સ માટે સીધી ક્વોલિફિકેશન પણ મેળવી લીધી છે.
લાલરેમસિયામીનો એકમાત્ર ગોલ બન્યો નિર્ણાયક
ચીન સામેની ફાઇનલમાં ભારત તરફથી લાલરેમસિયામીએ 10મી મિનિટે શાનદાર ગોલ કરીને ટીમને 1-0ની લીડ અપાવી હતી. રિવર્સ-હિટથી કરવામાં આવેલો આ ગોલ આખરે મેચનો એકમાત્ર ગોલ સાબિત થયો. ખાસ વાત એ હતી કે લાલરેમસિયામીની આ 200મી આંતરરાષ્ટ્રીય મેચ હતી.
ગોલ બાદ ચીને વાપસી માટે સતત દબાણ બનાવ્યું. જોકે ભારતીય ડિફેન્સે ચીનના હુમલાઓનો મજબૂતીથી સામનો કર્યો અને સ્કોરમાં કોઈ ફેરફાર થવા દીધો નહીં.
સવિતા પુનિયાની શાનદાર સેવથી ભારતને મોટી રાહત
મેચના બીજા ક્વાર્ટરમાં ચીનને પેનલ્ટી સ્ટ્રોક મળ્યો હતો. આ સમયે અનુભવી ગોલકીપર સવિતા પુનિયાએ શાનદાર સેવ કરીને ચીનને બરાબરી કરતા અટકાવ્યું. સવિતાએ ડાબી તરફ ડાઇવ લગાવીને પેનલ્ટી સ્ટ્રોક રોક્યો હતો.
આ સેવ બાદ પણ ચીને સતત હુમલા કર્યા અને અંતિમ ક્વાર્ટરમાં ભારત પર ભારે દબાણ બનાવ્યું. ચીને અંતિમ મિનિટોમાં ગોલકીપરને હટાવી વધારાના આઉટફિલ્ડ ખેલાડીને મેદાનમાં ઉતારીને બરાબરી કરવાનો પ્રયાસ કર્યો, પરંતુ ભારતીય ડિફેન્સે આખરી સિટી સુધી 1-0ની લીડ જાળવી રાખી.
1982 બાદ પ્રથમ વખત એશિયન ગેમ્સમાં ગોલ્ડ
ભારતીય મહિલા હોકી ટીમે અગાઉ 1982માં એશિયન ગેમ્સમાં ગોલ્ડ મેડલ જીત્યો હતો. ત્યારબાદ 1998 અને 2018માં ટીમ ફાઇનલ સુધી પહોંચી હતી, પરંતુ બંને વખત સિલ્વર મેડલથી સંતોષ માનવો પડ્યો હતો. હવે 2026માં ચીનને હરાવીને ભારતે ફરી એક વખત એશિયન ગેમ્સનું ગોલ્ડ મેડલ પોતાના નામે કર્યું છે.
LA 2028 ઓલિમ્પિક્સ માટે સીધી એન્ટ્રી
એશિયન ગેમ્સમાં ગોલ્ડ જીતવાની સાથે ભારતીય મહિલા હોકી ટીમને લોસ એન્જલસ ઓલિમ્પિક્સ 2028 માટે સીધી ક્વોલિફિકેશન મળી છે. એટલે હવે ટીમને ઓલિમ્પિક્સમાં સ્થાન મેળવવા માટે અલગ ક્વોલિફિકેશન ટૂર્નામેન્ટ રમવાની જરૂર નહીં પડે.
ભારતીય મહિલા હોકી માટે આ જીત એક મહત્વપૂર્ણ સિદ્ધિ બની છે—44 વર્ષ બાદ એશિયન ગેમ્સનું ગોલ્ડ અને સાથે જ 2028 ઓલિમ્પિક્સનું સીધું ટિકિટ.
