દિલ્હી પોલીસની એક ખાસ ટીમે પ્રતિબંધિત આતંકવાદી સંગઠન લશ્કર-એ-તૈયબા (LeT) સાથે જોડાયેલા એક આતંકવાદીની ધરપકડ કરી છે. આ આતંકવાદીની ઓળખ શબ્બીર અહેમદ લોન તરીકે થઈ છે. આરોપી તાજેતરમાં મેટ્રો પોસ્ટર કેસમાં ધરપકડ કરાયેલ લશ્કર-એ-તૈયબા મોડ્યુલનો હેન્ડલર હતો. તપાસમાં જાણવા મળ્યું છે કે તે બાંગ્લાદેશથી ભારત વિરોધી પ્રવૃત્તિઓ ચલાવતો હતો. આ આખું નેટવર્ક પાકિસ્તાનની ગુપ્તચર એજન્સી, ઇન્ટર-સર્વિસિસ ઇન્ટેલિજન્સ (ISI) ના ઇશારે કાર્યરત હતું.
સુરક્ષા એજન્સીઓને મળી મોટી સફળતા
તપાસમાં સામે આવ્યું છે કે, આ આતંકી બાંગ્લાદેશમાં રહીને પાકિસ્તાની ગુપ્તચર એજન્સી ISIના ઈશારે લશ્કરનું નવું મોડ્યુલ તૈયાર કરી રહ્યો હતો. તપાસ એજન્સીઓ અનુસાર, શબ્બીર અહેમદ લોન લશ્કરના વડા હાફિઝ સઈદ અને ઝકી-ઉર-રહેમાન લખવી જેવા આતંકવાદીઓ સાથે સીધા સંપર્કમાં હતો. આ મોડ્યુલને પાકિસ્તાનની ગુપ્તચર એજન્સી, ISI તરફથી ભંડોળ અને સમર્થન મળતું હતું. બાંગ્લાદેશથી કાર્યરત, લોન ભારતમાં આતંકવાદીઓની ભરતી અને બ્રેઈનવોશ કરતો હતો. ગેરકાયદેસર બાંગ્લાદેશી નાગરિકોને નિશાન બનાવવામાં આવતા હતા અને કટ્ટરપંથી બનાવવામાં આવતા હતા.
દિલ્હી પોલીસ અને સુરક્ષા દળોએ મળેલી ગુપ્ત માહિતીના આધારે જાળ બિછાવીને તેને દિલ્હી બોર્ડર પરથી દબોચી લીધો છે. તે ભારત વિરોધી પ્રવૃત્તિઓ કરવાના મિશન પર હતો. હાલ એજન્સીઓ તેની પૂછપરછ કરી રહી છે કે દિલ્હી અને તેની આસપાસના વિસ્તારોમાં તેના અન્ય કેટલા સાથીઓ છુપાયેલા છે.
