શેરબજારમાં છેલ્લા 4 દિવસમાં સેન્સેક્સ 2700થી વધુ પોઈન્ટ તૂટતાં રોકાણકારોના 14 લાખ કરોડ રૂપિયા ધોવાઈ ગયા છે. ક્રૂડ ઓઈલના ભાવ વધારા, અમેરિકન બોન્ડ યીલ્ડ 5.2%થી ઉપર પહોંચવા અને વિદેશી રોકાણકારોની સતત વેચવાલીને કારણે બજારમાં ભારે ઘટાડો જોવા મળ્યો છે.
ભારતીય શેરબજારમાં સોમવાર, 28 સપ્ટેમ્બરે ભારે વેચવાલી જોવા મળી હતી. BSE Sensex 1,124.02 પોઈન્ટ એટલે કે 1.52 ટકા ઘટીને 72,771.72 પર બંધ થયો, જ્યારે Nifty 50 360.25 પોઈન્ટ એટલે કે 1.56 ટકા ઘટીને 22,780.25 પર આવી ગયો. બંને મુખ્ય સૂચકાંકો લગભગ છ મહિનાના નીચલા સ્તરે બંધ થયા હતા.
એક જ દિવસમાં ₹7.52 લાખ કરોડની રોકાણકાર સંપત્તિ ઘટી
બજારમાં આવેલા ભારે ઘટાડાની સીધી અસર રોકાણકારોની સંપત્તિ પર પડી હતી. સોમવારના સેશન દરમિયાન BSE પર લિસ્ટેડ કંપનીઓનું કુલ માર્કેટ વેલ્યુએશન નોંધપાત્ર રીતે ઘટ્યું અને રોકાણકારોની સંપત્તિમાં આશરે ₹7.52 લાખ કરોડનો ઘટાડો નોંધાયો હતો.
મહત્વનું એ છે કે આ આંકડો એક દિવસના ઘટાડાનો છે. જ્યારે 27 ઓગસ્ટથી 28 સપ્ટેમ્બર સુધીના આશરે એક મહિનાના ગાળામાં Sensex અને Niftyમાં 5 ટકાથી વધુ ઘટાડા વચ્ચે રોકાણકારોની સંપત્તિમાં કુલ આશરે ₹17.17 લાખ કરોડનો ઘટાડો નોંધાયો હતો.
Sensex છ મહિનાના નીચલા સ્તરે
28 સપ્ટેમ્બરે Sensex 73,734.83ની આસપાસ ખુલ્યો હતો અને દિવસ દરમિયાન વધુ વેચવાલી વચ્ચે 72,716.23 સુધી નીચે ગયો હતો. અંતે તે 72,771.72 પર બંધ રહ્યો.
આ 30 શેરનો સૂચકાંક 30 માર્ચ 2026 પછીના સૌથી નીચા ક્લોઝિંગ લેવલે પહોંચ્યો હતો.
બીજી તરફ Nifty 50 360.25 પોઈન્ટ ઘટીને 22,780.25 પર બંધ થયો હતો. Niftyમાં સામેલ 50માંથી 47 શેર ઘટાડા સાથે બંધ થયા હતા, જે બજારમાં વ્યાપક વેચવાલી દર્શાવે છે.
બજારમાં ઘટાડાના મુખ્ય કારણો શું?
1. ક્રૂડ ઓઈલના ભાવમાં મોટો ઉછાળો
શેરબજાર પર સૌથી મોટું દબાણ ક્રૂડ ઓઈલના વધતા ભાવનું જોવા મળ્યું છે. અમેરિકા અને ઈરાન વચ્ચેના તણાવ તથા હોર્મુઝની સામુદ્રધુની ફરી ખોલવા અંગેની અનિશ્ચિતતાને કારણે Brent crude લગભગ $107-$108 પ્રતિ બેરલ સુધી પહોંચી ગયું હતું.
ભારત પોતાની ક્રૂડ ઓઈલની જરૂરિયાત માટે મોટા પ્રમાણમાં આયાત પર નિર્ભર હોવાથી મોંઘા ક્રૂડથી આયાત બિલ, મોંઘવારી અને કંપનીઓના ખર્ચ પર દબાણ વધવાની ચિંતા રહે છે.
2. અમેરિકન બોન્ડ યીલ્ડ 5.2%થી ઉપર
અમેરિકાની 10 વર્ષની Treasury yield પણ લગભગ 5.21-5.22 ટકા સુધી પહોંચી હતી. ઊંચી US bond yieldને કારણે વૈશ્વિક રોકાણકારો માટે અમેરિકન બોન્ડ જેવા ડોલર આધારિત એસેટ્સ વધુ આકર્ષક બની શકે છે, જેના કારણે emerging marketsમાં મૂડી પ્રવાહ પર દબાણ આવી શકે છે.
3. વિદેશી રોકાણકારોની વેચવાલી
વિદેશી સંસ્થાકીય રોકાણકારો (FII/FPI)ની સતત વેચવાલી પણ ભારતીય બજાર માટે મોટું દબાણ બની છે.
28 સપ્ટેમ્બરે વિદેશી રોકાણકારોએ ભારતીય શેરોમાંથી આશરે ₹3,693.93 કરોડની નેટ વેચવાલી કરી હતી, જ્યારે સ્થાનિક સંસ્થાકીય રોકાણકારોએ આશરે ₹2,838.17 કરોડની ખરીદી કરી હતી.
રૂપિયો પણ દબાણ હેઠળ
શેરબજારની સાથે ભારતીય રૂપિયો પણ દબાણ હેઠળ રહ્યો. 28 સપ્ટેમ્બરે રૂપિયો ડોલર સામે લગભગ ₹95.98 પર બંધ થયો હતો. ઊંચા ક્રૂડ ભાવ, વધતી વૈશ્વિક બોન્ડ યીલ્ડ અને ભૂ-રાજકીય અનિશ્ચિતતા વચ્ચે રૂપિયામાં પણ નબળાઈ જોવા મળી.
તમામ મુખ્ય સેક્ટરમાં વેચવાલી
સોમવારના સેશનમાં ઘટાડો માત્ર કેટલાક શેર પૂરતો મર્યાદિત રહ્યો નહોતો. લગભગ તમામ મુખ્ય સેક્ટરમાં વેચવાલી જોવા મળી હતી. ખાસ કરીને બેન્કિંગ, ફાઇનાન્શિયલ, PSU બેન્ક, મેટલ, FMCG, ઓટો અને ઓઈલ-ગેસ શેરો પર દબાણ રહ્યું હતું.
