કેન્યાની રાજધાની નૈરોબીમાં એક ભયાનક વિમાન દુર્ઘટના બની છે, જેમાં 6 લોકોના મોત થયાના અહેવાલ છે. મૃતકોમાં 2 ડોક્ટર, 2 નર્સ અને 2 નાગરિકોનો સમાવેશ થાય છે. કેન્યા સિવિલ એવિએશન ઓથોરિટીએ દુર્ઘટનાની પુષ્ટિ કરતા કહ્યું કે એર એમ્બ્યુલન્સ રહેણાંક વિસ્તારમાં આવેલી એક શાળા ઉપર ક્રેશ થઈ હતી.
આ અકસ્માતમાં કેટલાક ઘરો નષ્ટ થયા છે અને કેટલાક લોકો ઈજાગ્રસ્ત પણ થયા છે. શાળાની બિલ્ડિંગ પણ ધરાશાયી થઈ ગઈ. એર એમ્બ્યુલન્સ પડતાની સાથે જ તેમાં આગ લાગી ગઈ હતી. આમ્બૂ કાઉન્ટી કમિશનર હેનરી વાફુલાએ અકસ્માત અંગે માહિતી આપી હતી કે અકસ્માતમાં ઈજાગ્રસ્તોને હોસ્પિટલમાં લઈ જવામાં આવ્યા છે. જ્યારે મૃતદેહોને પોસ્ટમોર્ટમ માટે મોકલવામાં આવ્યા છે.
આ અકસ્માત સ્થાનિક સમય મુજબ 7 ઓગસ્ટના રોજ બપોરે 2:14 વાગ્યે થયો હતો. એર એમ્બ્યુલન્સ વિલ્સન એરપોર્ટથી સોમાલિયાના હરગેસિયા શહેર જવા માટે ઉડાન ભરી હતી. ટેકઓફ થયાના 3 મિનિટ પછી એર એમ્બ્યુલન્સ રડારથી ગાયબ થઈ ગઈ અને ATC સાથેનો સંપર્ક પણ તૂટી ગયો હતો.
